Maglikay Sa Ama Niamo
(
Adapted from "Beware The Lord's Prayer")
Ama Niamo na yaon sa langit...
"Anong kaipuhan mo?"
Dai mo ako istorbohon nagpapangadye ako.
"Pero inapod mo ako."
Inapod ta ka? Dai taka pig- apod? Nagpapangadye ako sa "Ama Niamo na yaon sa langit."
"O iyo na naman! Inotro mo pa!"
Pero mayo man akong gustong sabihon kaiyan. Nagsasambit lang ako kan pangadyeon sa aldaw na ini. Pag Pirmi kong pinapangadye an Ama Niamo nagrarahay an pagmati ko...garo baga igwa akong nahaman na gibo.
"O sige...ipadagos mo."
Pabanalon an Ngaran Mo...
"Halat. Ano man an boot mong sabihon kaiyan?"
Kan ano po?
"Kan Pabanalon an Ngaran Mo."
An boot ko pong sabihon...ay inda... dai ko man talaga nasasabotan an boot sabihon kaiyan. Pano ko man po maaaraman? Parte man lang yan kan pangadyeon. Pero ano po talaga an boot ipasabot kaiyan?
"Boot sabihon kagalang-galang, banal, marahayon."
Ah! Dai ko iniisip na arog kayan kararom an linyang iyan.
Magdatong an kahadean mo. Mangyari an boot mo sa daga nin siring sa langit...
"Minamawot mo talaga yan?"
Syempre po! Tano man ta dai?
"Ano an gigibohon mo manonongod kaiyan?
Gigibohon po ? Mayo? Sa pagmati ko po mas makakarahay kun kontrolon mo an mga sitwasyon digdi sa daga nin siring sa pagkontrol mo sa mga bagay na nasa langit.
"Tano ika nakokontrol ko?
Nagsisimba man po baga ako.
" Bako yan an pighahagad ko saimo. Pano an saimong mga kahugakan? An pagkaaranggoton mo? Dakula an problema mo sa bagay na iyan. An paggastos mo nin kwarta na daing huno- huno. Saro pa diyan an klase kan mga babasahon na pinagtatawan mo nin dakula na oras."
Dai mo ako pag-insultohon!! Kaparehas ko lang an mga ipokrita na nasa simbahan.
"Halat. Akala ko nagpapangadye ka na Mangyari an Boot Ko. Kun iyan an gusto mong mangyari, kaipuhan magpoon iyan sa taong totoong nagpapangadye. Arog saimo."
Ah, okey! Aram ko man po an mga bisyo ko. Gusto mo po sabihon ko pa an iba.
"Araram ko man an gabos na ginigibo mo."
Dai ko talaga yan pigpaparaisip kaidto. Pero gusto ko naman haleon an mga iyan asin magbago.
"Marhay ta ngonyan igwang padudumanan an orolay tang ini. Matarabangan kita. Dakul kitang pwedeng matrayumpuhan. Naoogma ako saimo."
Kagurangnan, halat po. Nahahaloy na ako, kaipuhan matapos ko na ini. An samong kakanon sa aroaldaw, itao mo samuya ngonian.
"Kaipuhan mong manao sa iba, dakulaon ka na"
Halat po muna !Iniinsulto mo na naman ako. Uya ako ginigibo an obligasyon bilang Kristyano tapos bigla na lang papagiromdomon mo ako kan mga gawi- gawi ko.
"Depicil talaga an magpamibi. Kaipuhan tang magbago. Arog kan pagpasan ko kan cruz mo. Inapod mo ako,uya ako.Huri na para sa pagbasol.Magpangadye ka, interesado ako sa masurunod na sasabihon mo."
Natatakot ako..
" Sain?"
Aram ko na an sasabihon mo.
"Porbaran mo.Hilingon ta."
Patawadon Mo kami kan samong mga kasalan, siring na pinapatawad niamo an mga nagkakasala samuya.
"Pano si Caloy?"
Sabi ko na. Aram ko sasambiton Mo siya. Tano po, Kagurangnan?
Naghahambog siya sakuya. Pigdadaya niya ako sa kwarta. Dai niya ako pigbabayadan. Isinumpa ko na mabalos ako saiya.
"Pero nasa pangadye mo. Pano palan an pangadye mo?"
Dai ko man yan isinasaboot.
"Sabagay maski parapapano bako ka man madaya. Pero dai makakagian na padagos mong dinadara an kaanggotan sa puso mo."
Mauulian ako kun makabalos na saiya. Igwa na akong pigpaplano saiya na pagnamatian niya mabasol siya na pigkulgan niya ako.
"Dai man magiging marahay an pagmati mo, mas makakaraot. Mayong karahayan an pagbalos. Mation mo kun pano ka kamiserable ngonian.Pero kaya ko yan baguhon."
Kaya mo po ? Pano?
"Patawadon mo si Caloy". Tapos, papatawadon taka man. An anggot asin kasalan problema na ni Caloy bakong saimo. Nawara man si kwarta mo pero nagkaigwa man katoninongan an puso mo."
Pero Kagurangnan, dai ko kayang patawadon si Caloy.
"Di dai taka man mapapatawad."
O sige, tama ka po. Pirmi ka man tama, Kagurangnan. Maski minamawot ko na magbalos ki Caloy, mas gusto kan puso ko na maging marhay sa paghiling mo. O sige, sige, pinapatawad ko na siya. Tatabangan ko siya na mahanap an tamang dalan kan buhay, Kagurangnan. Miserable an buhay niya. sana lang igiya mo man siya sa tamang dalan.
"Wow! Gusto ko iyan. O ngonian ano na an pagmati mo?"
Hmmm...magayagaya sa pagmati. Aram mo po, Kagurangnan baka makaturog naman akong tuninong ngonian na banggi.
"Dai ka pa tapos kan pamibi. Ipadagos mo."
Ah, okey! asin hare kami pagdaraha sa sogot ; kundi agawa kami sa maraot.
"Magayon. Magayonon. Gigibohon ko iyan. Dai ka lang magpatentar."
Anong gusto mo pong sabihon kaiyan?
"Dai ka magparahiling sa mga malalaswang babasahon arog kan Playboy. Magbago ka nin barkada. Ang iba sainda gusto kang pakaraoton. Idadamay ka ninda sa mga salang gibo. Dai ka magpaloko. Pigsasabi ninda na maogma sinda, pero saimo dakulang karaotan. Dai mo ako gamiton na sangkalan."
Dai taka po nasasabotan?
"Iyo. Ginibo mo na nin dakulon na beses. Nakabali ka sa sarong makanos na insidente, sarong karerebokan, tapos nagdulag ka pasiring sakuya. Sabi mo, " Kagurangnan, tabangi ako na malampasan an kagabatan na ini. Nagpopromiso ako na dai na maotro. Nagiromdoman mo idtong mga pigpromiso mi sakuya?"
Iyo po, Kagurangnan. Nasusupog man po ngani ako talaga kaidto.
"Arin an nagigiromdoman mo?"
Kaidtong nahiling ako kan babaeng kataid mi an harong hali ako sa kompyuteran sabi ko saimo, "Diyos ko, dai mo po sana tugutan na sabihon sa nanay ko kun nagsain ako. Pigpapangako ko po pirmi akong masimba kada Domingo.
"Dai niya sinabi sa nanay mo, pero dai mo man ginibo si pangako mo sako , bakong iyo?.
Patawadon mo po ako , Kagurangnan. Sagkod ngonyan akala ko an pagpangadye arog sana kaiyan.Dai ko po aram na sisimbagon mo akong arog kaiyan..
"Sige, ipadagos mo asin taposon mo na an pagpangadye mo."
Ta saimo an kahadean, an kapangyarihan, asin kamurawayan, sa mga kapanahonan. Amen.
"Aram mo kun ano an magtatao nin kamurawayan sakuya? Ano an makakapaogma sakuya?"
Dai po , Kagurangnan. Pero gusto ko pong maaraman. Nahihiling ko na po an karahayan kan totoong nagsusunod saimo.
"Pigsimbag mo na an hapot mo."
Iyo na po, Kagurangnan?
"Iyo na .An bagay na makakatao sako nin kamurawayan iyo an mga taong arog saimo na namomoot asin nagsusunod sakuya. Namamati ko na, nangyayari na ini ngonyan sato.Ngonyan, na pigsabi mo na an mga pagkakasala mo, mayo nang bagay na dai ta kayang gibohon kun ibahan kita."
Kagurangnan, halaton ta po kun ano an magigibo asin mababago pa sako, okey lang po?
"Okey, halaton ta...
