TIGSIK

TIGSIK

 

Tigsik ko an kanta kan mga Bicolano,

Maski haloy na garo pirmi sanang bago,

Si Nanay, Si Tatay, o maging an Boses ni Lolo,

Dai nalilingawan, sarong dakulang orgolyo.

Tigsik ko man an mga Bicolano,

Nagpamisa, nagsantorosaryo, nag- arang sa mga Santo.

Dakula an pagtubod na talagang mababago

Pati an direksyon kan makukusog na bagyo!

Tigsik ko man an mga parabuya,

Sa salog kan Naga priming iriba- iba.

Mag- init , mag- uran, naghaharalat sinda

Nagpapahiling kan dakulang pagtubod sa Virgen de Peñafrancia.               

Tigsik ko man an mga parabayle,

Mag aki, mag gurang, iwad- iwad na sa kalye

Haralipot na sulot, talagang kawili- wili,

Dai nagpapalihis, talagang binabarabanggi.

Tigsik ko man an mga soltero’t daraga

Sa panahon ngonyan talagang nabago na,

Modernong paghiro, pagbulos asin pagkanta.

Nagpapahiling lang kan progresibongkultura.

TIGSIK 2

1. Tigsik ko man ining eskwelahan,
   Sa harayo akala mo turultulan,
   An eskwela nagdadaradaralagan,
   Ta an mga maestra sigeng tsirismisan!

2. Tigsik ko man an kamagurangan,
   Minsan dai mo magkairintindihan,
   Oras nin pag- orolay dai nakikiaram
   Alagad pag- uli sige an yaramutam!

3. Tigsik ko man an baha sa eskwelahan,
   Pirming sanop an samuyang dalan,
   Mga aki dakula an kaogmahan,
   Pagpuli barasa, ta sige an siriwagan!

4. Tigsik ko man an mga eskwela,
   Pag mauran- uran warara talaga,
   Takot na baka makalintura,
    An totoo nahuhugak mag-eskwela!

TIGSIK 1

TIGSIK PARA SA KULTURANG BIKOLNON:

1.              Tigsik ko an mga Bicolano,

     Pirming inaagihan nin Bagyo,

     Baha minsan minalampas sa payo, 

     Haros gabos naghahagad sustento!

2.             Tigsik ko an mga paratienda,

     Nag- aasa sa card, producer at iba pa,

     Huna mo tagob an paninda,

     An laog palan puro chichiria!

3.              Tigsik ko an mga kantang Bikolnon,
     Dai nakakasawang pagdangogon,
     Maski sa harayo pirming guiromdom
     Mga sonatang pano' nin inspirasyon!

4.              Tigsik ko man an mga parauma,
     Sa sakit kan panahon, nagtotongod na sana,
     An saindang pag ani dai na ginagana,
     Huli ta an panahon ta sarala na baga!

5.              Tigsik ko man an daragang magayon,
     Inaagid siring sa Bulkan na Mayon,
     Siya mapusog asin mabinion
     Iyan an Bicolana, mapakumbaba, mamomoton.

6.   Tigsik ko man an Penafrancia Fiesta,
     Dakul na tawo an nagbibirisita,
     Gustong makiheras sa mga kahimanwa,
     Maotob lamang an saindang panata!

7.              Tigsik ko man ining siling maharangon,
     Numero unong tanda nin Kulturang Bikolnon,
     An mga lalaki igdi talagang matibayon,
                Garo sanang dulse kun hinaharalon!